សម្ព័ន្ធក្លិបកីឡាប៊ូល និងប៉េតង់ ចំនួន ៦០ មកពីតាមស្ថាប័ន និងរាជធានី ខេត្ត ទូទាំង ព្រះរាណាចក្រកម្ពុជា បានចូលរួមការប្រកួត កីឡាប៊ូល និងប៉េតង់ជ្រើសរើសជើងឯកថ្នាក់ជាតិ ឆ្នាំ២០២៥ ដែលប្រព្រឹត្តទៅពីថ្ងៃទី ២៨ ដល់ថ្ងៃទី ៣០ ខែ មករា ឆ្នាំ២០២៦ នៅពហុកីឡដ្ឋានជាតិអូឡាំពិក។
បើតាមរបាយការណ៍ពី លោក អ៊ិន គឹមស្រ៊ុន អនុប្រធាន គណៈកម្មការរៀបចំការប្រកួត កីឡាករ កីឡាការិនី ទាំងអស់មានចំនួន ៤១៦ នាក់ ដែលនេះបានបង្ហាញពីកំណើនច្រើនជាងការប្រកួតជើងឯកថ្នាក់ជាតិឆ្នាំទៅមិញ។
ឯកឧត្ដម សុខ សូកាន ប្រធានសហព័ន្ធកីឡាប៊ូល និងប៉េតង់កម្ពុជា មានប្រសាសន៍ថា ការប្រកួតកីឡាប៊ូល និងប៉េតង់ជ្រើសរើសជើងឯកថ្នាក់ ជាតិឆ្នាំ២០២៥ រៀបចំឡើងក្នុងគោលបំណងលើកស្ទួយវិស័យ កីឡាប៊ូល និងប៉េតង់ បង្កើនទំនាក់ទំនង សាមគ្គីភាព រវាងសម្ព័ន្ធ ក្លិប និងផ្តល់ឱកាសដល់ កីឡាករ កីឡាការិនី ទូទាំងប្រទេស ចូលរួមប្រកួតប្រជែង និងដុសខាត់ សមត្ថភាព និងជាវេទិកាសម្រាប់ សហព័ន្ធសម្លឹងមើល កីឡាករ កីឡាការិនី ដែលមានសក្ដានុពល និងឧបនិស្ស័យលើកីឡាប៉េតង់ ដើម្បីចូលរួមប្រមូលផ្តុំជា ក្រុមជម្រើសជាតិ នាឆ្នាំបន្តបន្ទាប់ទៀត។
សម្រាប់វិញ្ញាសាមានចំនួន ៨ រួមមានដូចជា ១-បុរស ១៨ ឆ្នាំឡើង ១នាក់ ទល់ ១នាក់, ២-នារី១៨ ឆ្នាំឡើង ១នាក់ ទល់ ១នាក់, ៣- កុមារី អាយុ ១២ ដល់ ១៥ ឆ្នាំ ១នាក់ ទល់ ១នាក់, ៤-កុមារា អាយុ ១២ ដល់ ១៥ ឆ្នាំ ១នាក់ ទល់ ១នាក់, ៥- បុរស ១៦ឆ្នាំ ឡើង វាយយកពិន្ទុ, ៦-នារី ១៦ឆ្នាំឡើង វាយយកពិន្ទុ, ៧-បុរស ១៦ ឆ្នាំឡើង ៣នាក់ ទល់ ៣នាក់ (គ្មានបម្រុង), និង ៨- នារី១៦ឆ្នាំឡើង ៣នាក់ ទល់ ៣នាក់ (គ្មានបម្រុង)៕
