សិស្សានុសិស្សជាង១០០នាក់នៃវិទ្យាល័យជាស៊ីមសាមគ្គីបានចូលរួមទទួលចំណេះដឹងពីប្រវត្តិចលនាអូឡាំពិកដែលត្រូវបានចែករំលែកដោយគ្រូឧទ្ទេសពីគណៈកម្មាធិការជាតិអូឡាំពិកកម្ពុជា (NOCC) នៅព្រឹកថ្ងៃពុធ ទី១០ ខែធ្នូ ឆ្នាំ២០២៥។
ឯកឧត្ដម ប៊ុយ សុភ័ណ្ឌ ទីប្រឹក្សា NOCC និង ជាគ្រូឧទ្ទេសមានប្រសាសន៍ថា កម្មវិធីនេះបានបង្ហាញដល់សិស្សានុសិស្សពីគុណតម្លៃនៃចលនាអូឡាំពិក និងប្រវត្តិនៃចលនាអូឡាំពិកតាំងពីសម័យក្រិកបុរាណដល់បច្ចុប្បន្ន។ ក្នុងនោះ ចក្ខុវិស័យនៃចលនាអូឡាំពិក គឺការកសាងពិភពលោកឱ្យកាន់តែស្រស់បំព្រងប្រកបដោយសន្តិភាពតាមរយៈកីឡា។
ឯកឧត្ដមដែលជាគ្រូឧទ្ទេសលម្អិតបែបនេះ "៖ តាំងពីចលនាអូឡាំពិកសម័យបុរាណក្នុងចក្រភពក្រិក តម្រូវឱ្យរដ្ឋទាំងអស់ដែលមានសង្គ្រាម និងកំពុងមានសង្គ្រាមត្រូវរៀបចំបទឈប់បាញ់រយៈពេលមួយខែ ដើម្បីឱ្យអត្តពលិកចូលរួមប្រកបដោយសុវត្ថិភាព និងសន្តិភាព។ ចំពោះគុណតម្លៃបទឈប់បាញ់ និងគុណតម្លៃអូឡាំពិកសម័យបុរាណត្រូវបានអនុវត្តដល់បច្ចុប្បន្ន ទាំងក្នុងព្រឹត្តិការណ៍កីឡាអូឡាំពិក អាស៊ីហ្គេម និងស៊ីហ្គេម តែងតែទទួលយក និងអនុវត្តនូវគុណតម្លៃនេះ។ ជាក់ស្ដែងកាលកម្ពុជាធ្វើជាម្ចាស់ផ្ទះកីឡាស៊ីហ្គេម ឆ្នាំ២០២៣ ក៏មានបាវចនា កីឡារស់ក្នុងសន្តិភាព។"
ប៉ុន្តែដោយឡែក ឯកឧត្ដម ប៊ុយ សុភ័ណ្ឌ បានបង្ហាញភាពសោកស្ដាយចំពោះថៃដែលជាម្ចាស់ផ្ទះកីឡាស៊ីហ្គេម២០២៥ មិនបានគោរពដល់ចក្ខុវិស័យនៃចលនាអូឡាំពិក តាមរយៈការឈ្លានពានកម្ពុជា។
បន្ទាប់ពីការចែករំលែកបទពិសោធ ពីចំណេះដឹងនានា សិស្សានុសិស្សក៏បានចូលរួមលេងកីឡាផ្សេងៗជាមួយគ្នាដែលរៀបចំឡើងដោយក្រុមការងារគណៈកម្មាធិការអូឡាំពិកកម្ពុជា។ ចំណែកសិស្សានុសិស្សវិទ្យាល័យ ជាស៊ីមសាមគ្គី បានបង្ហាញការសាទរដែលបានចូលរួមកម្មវិធីចែករំលែកពីគុណតម្លៃ និងចលនាអូឡាំពិក និងបានធ្វើឱ្យពួកគេបានដឹងកាន់តែច្បាស់ពីនិយមន័យកីឡា៕
