ខេត្តព្រះសីហនុ៖ កាលពីថ្ងៃទី ១៧ ខែវិច្ឆិកា ឆ្នាំ២០២៥ ម្សិលមិញនេះ ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំយុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានអញ្ចើញដឹកនាំកិច្ចប្រជុំជាមួយនឹង រដ្ឋបាលខេត្តព្រះសីហនុ ដើម្បីត្រៀមលក្ខណៈរៀបចំ ការប្រកួតកីឡាប្រដាល់គុនខ្មែរ ជើងឯកពិភពលោក ដែលគ្រោងនឹងធ្វើឡើងពីថ្ងៃទី១៧-២០ ខែធ្នូ ឆ្នាំ២០២៥ ។
ព្រឹត្តិការណ៍នេះ នឹងមានប្រតិភូ និងប្រទេសដែលចូលរួមមាន២៨ប្រទេស ដែលបានបញ្ជាក់ពីការចូលរួមរបស់ខ្លួន និងអាចនឹងកើនឡើងច្រើនជាង៣០ប្រទេសមកពីទ្វីបអាស៊ី អឺរ៉ុប អាមេរិក អូសេអានី និងអាហ្វ្រិក។ ខណៈដែរព្រឹត្តិការណ៍នេះបានរៀបចំឡើងក្រោមកិច្ចគាំទ្ររបស់រាជរដ្ឋាភិបាល ដែលមានសម្តេចធិបតី ហ៊ុន ម៉ាណែត ជាប្រមុខ ក្រសួងអប់រំយុវជន និងកីឡា គណៈកម្មាធិការជាតិអូឡាំពិក។
នេះ ជាព្រឹត្តិការណ៍ប្រវត្តិសាស្ត្រដ៏អស្ចារ្យថ្មីមួយទៀត សម្រាប់សហព័ន្ធ គុនខ្មែរអន្តរជាតិ ក្នុងការរៀបចំព្រឹត្តិការណ៍ពិភពលោកដ៏មានសក្តានុពល និងវិសាលភាពដ៏ធំធេងមួយដែលកើតមានឡើងក្នុងយុគសម័យតេជោធិបតីសន្តិភាពនាពេលនេះ។
ចំពោះកម្មវិធីប្រកួតគ្រោងនឹងរៀបចំកម្មវិធីបើកនៅថ្ងៃទី១៧ ខែធ្នូ ឆ្នាំ២០២៥ អមដោយការសម្តែងសិល្បៈរបាំ ចម្រៀង និងការសម្តែងក្បាច់គុនបុរាណខ្មែរផងដែរ ការប្រកួតលក្ខណៈស្ម័គ្រចិត្ត ពេញវ័យវគ្គជម្រុះ និងការប្រកួតអាជីពកម្រិតខ្ពស់ដណ្ដើមខ្សែក្រវាត់ជើងឯកគុនខ្មែរពិភពលោក២គូរៀងរាល់ថ្ងៃ (សរុប៨គូ) ដោយកីឡាករជួរមុខកម្រិតខ្ពស់របស់កម្ពុជា៨នាក់ប្រកួតជាមួយកីឡាករអាជីពកម្រិតខ្ពស់ៗមកពីបណ្តាប្រទេសនានា៕
