លោក Indra Sjafri គ្រូបង្គោលក្រុមបាល់ទាត់ជម្រើសជាតិយុវជនឥណ្ឌូនេស៊ី អាយុក្រោម២២ឆ្នាំគ្រោងកោះហៅកីឡាករ៣រូបដែលកំពុងប្រកបអាជីពនៅក្រៅប្រទេសចូលរួមជួយក្រុមក្នុងការការពារមេដាយមាសព្រឹត្តិការណ៍កីឡាស៊ីហ្គេម ២០២៥ ក្នុងខែធ្នូ ខាងមុខ។
គ្រូបង្វឹកដែលនាំក្រុម U22 ឥណ្ឌូនេស៊ី ឈ្នះមេដាយមាសបាល់ទាត់បុរសស៊ីហ្គេម ឆ្នាំ២០២៣ នៅកម្ពុជា កាលពីពីរឆ្នាំមុន ចង់បញ្ចូលកីឡាករ Marselino Ferdinan, Adrian Wibowo និង Tim Geypens តែអ្នកទាំង៣ក៏មានសិទ្ធិមិនចូលរួមបានដែរ ព្រោះស៊ីហ្គេមមិនស្ថិតក្នុង FIFA's Days ឡើយ។
Marselino Ferdinan ជាខ្សែបម្រើប្រយុទ្ធវ័យ២១ឆ្នាំ បច្ចុប្បន្នកំពុងលេងនៅក្លិប AS Trenčín នៃលីគកំពូលស្លូវ៉ាគី ក្នុងលក្ខខណ្ឌខ្ចីពីក្លិប Oxford United របស់អង់គ្លេស។
Adrian Wibowo ជាខ្សែបម្រើស្លាបវ័យ១៩ឆ្នាំ លេងនៅ Los Angeles FC នៃលីគកំពូលអាមេរិក ហើយគេមានឪពុកជាជនជាតិឥណ្ឌូនេស៊ី និងម្ដាយជាជនជាតិអាមេរិក។
Tim Geypens ខ្សែការពារស្លាបឆ្វេង កំពុងលេងនៅលីគ២ហូឡង់ វ័យ២០ឆ្នាំ និងជាកូនកាត់ឥណ្ឌូនេស៊ីហូឡង់។
សម្រាប់ការប្រកួតបាល់ទាត់បុរសស៊ីហ្គេម ២០២៥ ក្រុមយុវជនអាយុក្រោម២២ឆ្នាំឥណ្ឌូនេស៊ី ស្ថិតក្នុងពូល C មាន មីយ៉ាន់ម៉ា ហ្វីលីពីន និង សិង្ហបុរី ប្រព្រឹត្តទៅពីថ្ងៃទី៣ ដល់ថ្ងៃទី១៨ ខែធ្នូ ឆ្នាំ២០២៥៕
