លោក ធន់ សុភា គ្រូបង្គោលក្រុមថ្នាលកីឡាប្រដាល់គុនខ្មែរ បានសរសើរឆន្ទៈ និងការប្រកួតប្រកបដោយទំនុកចិត្តរបស់កីឡាការិនី អ៊ឹម ស្រីពេញ (ធន ស្រីពេញ) ក្នុងការប្រកួតដែលនាងបានយកឈ្នះកីឡាការិនីអ៊ីរ៉ង់ នៅថ្ងៃសុក្រ ទី២៤ ខែតុលា ឡើងទៅវគ្គពាក់កណ្ដាលផ្ដាច់ព្រ័ត្រកីឡាគុនខ្មែរ ប្រចាំព្រឹត្តិការណ៍កីឡាយុវជន អាស៊ី ឆ្នាំ២០២៥ នៅប្រទេសបារ៉ែន។
លោកគ្រូបង្វឹកជាអតីតកីឡាករគុនខ្មែរឆ្នើមមួយរូបដដែលនេះសង្កត់ធ្ងន់ថា ស្រីពេញជឿជាក់លើខ្លួនឯង និងប្រកួតដោយមិនភ័យតក់ស្លុតឡើយ។ លោកថា ប្រសិនបើនាងធ្វើបានបែនេះទៀតក្នុងវគ្គពាក់កណ្ដាលផ្ដាច់ព្រ័ត្រ នោះអាចមានសង្ឃឹមឡើងទៅវគ្គផ្ដាច់ព្រ័ត្របន្តទៀត។ លោករំពឹង៦០ភាគរយថា កូនសិស្សរូបនេះអាចធ្វើបាន។
ជុំវិញលទ្ធផលរបស់កូនក្រុមផ្សេងៗទៀត លោក ធន់ សុភា នៅតែសរសើរឆន្ទៈ និងការខិតខំរបស់ពួកគេ ទោះបីកីឡាករខ្លះទទួលបានលទ្ធផលមិនគាប់ចិត្តក៏ដោយ។ លោកថា ពួកគេធ្វើបានល្អប្រសើរហើយ ហើយក្នុងការប្រកួតម្សិលមិញនេះក៏ជួបការលំបាកមួយចំនួន ជាពិសេសពាក់ព័ន្ធទៅនឹងកម្ពស់តែម្ដង ដែលធ្វើឱ្យកូនក្រុមពិបាកវាយ។
ដូច្នេះកម្ពុជាមានអ្នកប្រយុទ្ធគុនខ្មែរ២រូបបានឡើងទៅវគ្គពាក់កណ្ដាលផ្ដាច់ព្រ័ត្រគុនខ្មែរកីឡាយុវជនអាស៊ី គឺមានកីឡាករ ថន ចន្ធូ និង កីឡាការិនី អ៊ឹម ស្រីពេញ ដែលត្រូវប្រកួតនៅថ្ងៃសៅរ៍ ទី២៥ ខែតុលា នេះ៕
