លោកអ្នកប្រហែលគិតថា គ្រប់កីឡាករបាល់ទាត់អាជីពនៅក្លិបធំៗ ឬលីគធំៗលើលោក ប្រហែលត្រូវតែជិះរថយន្ដទំនើបៗទៅកន្លែងហ្វឹកហាត់ហើយមើលទៅ។ តែវាមិនបែបនេះទាំងអស់ទេ។
ជាក់ស្ដែង Hector Bellerin ខ្សែការពារក្រុម Real Betis ដែលជាកីឡាករមានឈ្មោះល្បីគួរសម និងជាអតីតសមាជិកក្រុម Arsenal នៃលីគកំពូលអង់គ្លេសបានជ្រើសរើសកង់ជាមធ្យោបាយធ្វើដំណើរទៅហ្វឹកហាត់។
កីឡាករវ័យ៣០ឆ្នាំ និយាយថា "៖ វាមិនពិបាកអីក្នុងការជិះក្នុងឡានយ៉ាងស្រួលដើម្បីមកហ្វឹកហាត់។ ខ្ញុំអាចធ្វើបាន តែវាជាការផ្លាស់ប្ដូរ។ យើងត្រូវការទីក្រុងដែលមានពណ៌បៃតងជាមួយនឹងរថយន្តតិចជាងមុន។"
Bellerin តែងបង្ហាញពីជីវិតដ៏សាមញ្ញនៅលើបណ្ដាញសង្គមដែលមានអ្នកតាមដានចំនួន៣លាន៧សែននាក់របស់គេ។
Hector Bellerin បានចំណាយពេល១១ឆ្នាំនៅ Arsenal ពីឆ្នាំ២០១១ដល់២០២២ និងធ្លាប់លេងនៅ Barcelona និង Sporting Lisbon មុនចូលរួមជាមួយ Real Betis ក្នុងរដូវកាល២០២៣/២០២៤ ដល់បច្ចុប្បន្ន។ គេក៏ធ្លាប់ជាប់ជម្រើសជាតិអេស្ប៉ាញពីចន្លោះឆ្នាំ២០១៦ដល់២០២០ ដោយបង្ហាញខ្លួនបាន៤ដង៕
