លោក សែម ផល្លា នាយកចាត់ការទូទៅកម្មវិធីម៉ារ៉ាតុងនៅកម្ពុជា បានអំពាវនាវមហាជនទាំងជាតិ និងបរទេស ដែលចង់ចូលរួមទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរវត្ត លើកទី៣០ ឆ្នាំ២០២៥ ថ្ងៃទី៧ ខែធ្នូ ខាងមុខ សូមរួសរាន់ចុះឈ្មោះ ព្រោះសន្ទុះចូលរួមកាន់តែខ្លាំងក្លាជាងឆ្នាំមុនៗទៀត។
ជាក់ស្ដែងគិតត្រឹមពេលនេះ មានអ្នកចុះឈ្មោះចូលរួមជិត១ម៉ឺននាក់ហើយ។ លោក សែម ផល្លា រំពឹងថា អ្នកចូលរួមអាចឈានដល់១៥០០០នាក់ ឬលើសពីនេះ ខណៈជនជាតិអង់គ្លេសនាំមុខគេលើបេក្ខជនបរទេស បន្តអ្នករត់មកពីបារាំង និងសហរដ្ឋអាមេរិក។ ដូច្នេះការចុះបានរួសរាន់អាចបង្កភាពងាយស្រួលដល់អ្នករៀបចំដើម្បីគ្រប់គ្រងដំណើរការផ្សេងៗ។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍រយៈពេល៣០ឆ្នាំមកនេះ ព្រឹត្តិការណ៍រត់ប្រណាំងអន្តរជាតិខាងលើទទួលបានការគាំទ្រ និងកំណើនអ្នកចូលរួមយ៉ាងពេញទំហឹងតែម្ដង។ ជាក់ស្ដែងឆ្នាំ១៩៩៦ដែលជាឆ្នាំដំបូង មានអ្នកចូលរួមត្រឹមប្រមាណ៥០០នាក់ប៉ុណ្ណោះ តែឆ្នាំ២០២៤ មានជាង១៤០០០នាក់។ កំណើននេះបានបង្ហាញពីសុខសន្តិភាពយ៉ាងពេញលេញដែលផ្ដល់ទំនុកចិត្តដល់អ្នករត់ ជាពិសេសជនបរទេសក្នុងការសម្រេចចិត្តចូលរួម។
លោក ចាន់ រដ្ឋា អគ្គនាយកក្រុមហ៊ុន Manulife ប្រចាំកម្ពុជាថ្លែងថា ពាក្យស្លោកប្រចាំព្រឹត្តិការណ៍ឆ្នាំនេះ “រត់ដើម្បីភាពយូរអង្វែង” - ដោយបង្កប់ន័យសំខាន់ៗ 4
ទី ១- គឺជាការអបអរខួប ៣០ឆ្នាំនៃភាពយូរអង្វែងរបស់ព្រឹត្តិការណ៍ (Honor the legacy of the race)
ទី ២- ក្នុងរយៈពេល ៣០ឆ្នាំ កន្លងមកនេះ ព្រឹត្តិការណ៍បានជួយឱ្យអ្នកចូលរួមរត់គ្រប់វ័យ គ្រប់ជាតិសាសន៍ មានសុខភាពល្អ និងមានទម្លាប់រស់នៅបែប សកម្ម តាមរយៈការចូលរួមរត់ជារៀងរាល់ឆ្នាំ ដែលនេះហើយជាមូលដ្ឋានក្នុងការរស់នៅបានយូរអង្វែង (មានអាយុវែង) (Helping people live longer, healthier, better lives)
ទី ៣- គឺមោទនភាពចំពោះភាពយូរអង្វែងនៃបេតិកភណ្ឌអង្គរ ដែលមានអាយុកាលជាង ៩០០ឆ្នាំ ហើយនៅតែឈរ យ៉ាងរឹងមាំ ផ្តល់ជាផ្ទាំងទសន្សនីយភាពដ៏ ស្រស់ត្រកាលតែមួយគត់នៅលើពិភពលោក សម្រាប់អ្នករត់ប្រណាំងគ្រប់ទិសទីមកកាន់ឧទ្យានអង្គរនៃយើង
ទី ៤ - គឺការដឹងគុណដល់ភាពយូរអង្វែងនៃសន្តិភាព ដូចពាក្យស្លោក “កីឡារស់ក្នុងសន្តិភាព” មានសន្តិភាពទើបយើងអាចមានការជួបជុំដ៏សប្បាយរីករាយក្នុង ថ្ងៃព្រឹត្តិការណ៍។”
